عجبي قلم / طه إبراهيم

عجبي
****
عجبى عليكى يا دنيا
فيكى العجب الوان
كل اللى فيكى يحير
والعقل فيكى جنان
والصبح فيكى اتغير
والليل ملوش عنوان
والعمر فيكي قُصير
ولا حاجه فيكي أمان
والحلم لسه صُغير
وشعور من الحرمان
والظلم فيكي شهامه
والحق فيكي مدان
والنخوي فيكي ندامه
تيجي علي الغلبان
والفوضى فيكى علامه
فوضي ف كل مكان
والدم فيكى رخيص
عيني علي الأنسان
لو كنت حر حريص
تبقي النهاية لومان
وإن عشت بالتهليس
تكسب ذهب مرجان
وإن فات عليك إبليس
تبقي إنت صوبر مان
حفله ف قلب باريس
وعزبه كام فدان
وإن يوم عملت حسيس
تبقي عميل وجبان
ويفوت عليك اتوبيس
أعمي مالوهش ودان
يسخر من التهييس
ويشيب ...... الولدان
ويجامل ...... المتاعيس
علي حساب غلبان
اصل الحكاية بسيطه
ثوره علي الانسان
ابكى ولم الزيطه
واصرخ بالف لسان
متلائى غير القهر
والعتمه ...... والحرمان
والظلم طول الدهر
على خطا الاحزان
اصرخ بصوت مكتوم
اوعى الحقيقه تبان
افضل تكون مهزوم
راضي بأي هوان
أصرخ ولم القوم
هتلائى ميت سجان
إوعي تقول مظلوم
إوعي تقول غلبان
لازم يكون معلوم
إن الكلام بميزان
دنيا وفيها اللوم
بعروفه ....... بالعدوان
عجبي عليكي يا دنيا
فيكي العجب ألوان

******
بقلم / طه إبراهيم