سكووووووت بقلم الشاعر / رشاد الدهشورى‏

سكووووووت
قضيها جنب الحيط وحازر م الودان
دى دبه النمله فى بلدنا صوط ادان
قضيها زى الطور ودور
دا الجزارين مترصدين
وهيدبحوك من غير اوان
ابلع لسانك وانكتم
عيش حمار يحلم بحفنه تبن
او ربطه خضار
واياك تبرطع كالعبيط
هيسحلوك ويشوهوك
ويحطو فوق ضهرك غبيط
وف النهايه يسلخوك
ويرمو لحمك للكلاب
او يفرموك
وللغلابه يوزعوك اكلة كباب

دنيا عجيبة غريبة بقلم / أبو دسوقي

دنيا عجيبة غريبة فيها البشر مساكين
يوم بتضحك ويوم بتبكي وكلنا مسافرين
ولو خدمتك يا دنيا يوما حشرتيني مع المنافقين
ولو إستخدمتك دارت علينا الحرب من الشمال لليمين
طظ فيكي وطظ ليكي وطظ لمن تبعك من البنيآدمين
أبو دسوقي

{فضفضات}. بقلم د / سمير فوزي عمر

:::{فضفضات}.......بقلم ...د/سميرفوزي عمر
رحيقُ الشهدِمن شفتيْها أسْكَرَني
وسهمٌ طاشَ من عينيْها أرداني
في قاع القبر بعينيها تُحاصِرُني 
في نار العشق ربُ الخلق ألقاني
يذوبُ الجلدُ وجمرُ النار يصهرُني
وأدعو الله أن لا تُشفى أبداني
.....................................{من ديواني ........فصحى سمير فوزي}

{هنيئاً لكم يااااااعرب}بقلم .د/ سمير فوزي عمر

::::{هنيئاً لكم يااااااعرب}::::: "رباعية "بقلم .....د/ سمير فوزي عمر"تعليقا على قصف طائرات التحالف العربي سوق شعبي باليمن وقتل 25 من الاعداء العرب ههههه !!!!..."
هَنيئاً لكم بزئيركم....
هنيئاً لكم ياااااعرب
بعتُم للغرب نسائَكم....
والأخٌ على الأخٍ إنتَصَب
هَيًا ...أقيموا حفلَكُم....
وأَقِرٌوا عينَ المُغْتَصِب
ولكل ثكلى بَشٍروا....
ذَكَرُ البِغالِ قد حَلَب
................................{من ديواني .......فُصحى سمير فوزي}

يابهية بقلم الشاعر / محمد مصطفي الفلو

يابهية لييييلك طول
القمر ف كسوووف
و ف عز نهاااااارك 
شمسك ف خسوووف
 محمد الفلو

كل الناس فى كل زمان بقلم الشاعر / مرقص اقلاديوس

كل الناس فى كل زمان و مكان
بتدور على سر السعادة
و الاكادة
ان لحد دلوقت
 ماحدش لقا السر

و جايز ما بين
كل الف واحد
تلاقى واحد لقاه
لكن لا بيرضى يبوح
 و لا بيرضى يقر

و ناس كتير بتحاول
و تمشى الف خطوة لقدام
و لما يبقى على بعد خطوة
 يعمل للخلف در

و ناس كتير مشيت و تعبت
و فى الااخر زهقت
و يقوللك
بقا معقول واحد زيك متعلم
 يصدق ان للسعادة سر

ناس تقوللك السعادة المال
و ناس معاها فلوس كتير
و مش سعيدة
و ناس تقوللك السعادة الصحة
و صحتها تهد جبال
تقرب منه
 تلقاه عايش فى دنيا بعيدة

و ناس تقوللك
السعادة فى الولد فى الصبية
و تكبر البنت
يبقا كل املها البيت الجديد
 و يكبر الولد و يسافر بعيد

و ناس تقوللك
السعادة نفوذ صولجان
و يعيش طول عمره
يدوس على الخلق
و يعتبر نفسه
ملك الزمان و ملك المكان
و يقوللك
انا اللى هاقرر اللى جاى
 زى ما قررت اللى كان

و فى لحظة روحه تفارقه
و يتقال عليه
ماكانش اكتر من دخان
ظهر على الأرض ساعة زمان
 و فى الااخر لفظه المكان

اوعاك تكون بتدور على السعادة
فوق جبل
او فى عمق بير
و فاكر ان بلد السعادة بعيد
فى طريق يطول ليه المسير
تفتكر انها
فى اللى طالته
على مدى العمر ايديك
او تفتكر
ان هيا اللى فى يوم
 هتدور عليك

السعادة
انك تفضل قريب
من ربنا
اللى ياما اداك
و لغاية النهاردة بيديك
السعادة
انك تقرب بالمحبة
كل الناس ليك
حتى اللى بيكرهك و معاديك
السعادة
انك تدي مش تاخد
تديهم من فضل ربنا
اللى افضاله عليهم و عليك
الشاعر العجوز
مرقص اقلاديوس