كشك سجاير بقلم الشاعر ربيع امام

كشك سجاير
-- --
بعد سنين طويله
من ركنه ضهره
علي الخرابه اللي وراة
الخرابه اللي بحكم العشرة
قامت بينهم مودة
فتح لها قلبه
وماقدرش يقفله تاني
بعد ما حسسها بونس الاطفال وهما رايحين جايين
يرمو جواها ورق الملبس
انهاردة
وبعد العمر ده كله
وبعد الحاح طويل
من الظروف الصحيه
اضطر عم محمد
انه يصفيه
ويقلبه كنبه
يمدد عليها
بعد ماخابت رجلين السرير الصاج
اللي عندة ودابت من غير ماتتاسف له
زي ما ابتسم عم محمد للكشك
وطبطب عليه وسابه سرحان
بيتخيل شكل المنشار
وهو بيقرب منه
ماقدرش يمسك نفسه
خد الخرابه ووقع علي الارض
بعد ما ودع اخر علبه سجاير
اشتراها النجار