نصيحه صديق الشاعر طه ابراهيم

نصيحة صديق

*******
جالي صديقي وقالي نصيحه
قالي كلام محتاج لشجاعه
قلي الشعر عملك إيه
إحسب عمرك ضاع كم ساعه
ياما كتبت كتير ونشرت
فاكر يعني الشعر بضاعه
جرب مره وبيع أشعارك
إعلن عنها ف أي إذاعه
إعلن عنها العشر بقرش
شوف كم واحد عنده قناعه
ياما نشرت كتير وكتبت
إكتب و إقلب ف البلاعه
والبلاعه ف الآخر بير
تبلع أي كلام يا جماعه
عمال تكتب ليل ونهار
شوف كم ليله وشوف كم ساعه
شوف كم مره تركت ولادك
تلعب بيهم أي إشاعه
شوف كم مره خاصمت مراتك
ترمي عليك وانت الشماعه
كل شويه تقولك قوم
وتسربلك ... أي .... إشاعه
كل كلامها تلاقي هموم
والاسعار ... هي ... الفزاعه
الاولاد ... وهموم ... الدار
إرمي وحمل ع الشماعه
قالوا علينا بقينا كبار
كله هيزار وأمور خداعه
فكر تاني يا صحبي بعقلك
و لا كفايه علينا إشاعه
نسمع منهم بس كلام
عمال يخرم ف السماعه
وانت يا عيني مسلم عقلك
خايف من النفس الطماعه
شوف كم مره في عز الليل
تجري تدور ع الولاعه
نفسك تكتب كلمه مفيده
تعمل نهضه وتعمل طاعه
نفسك كل الناس ترتاح
لما تلاقي علاج ومناعه
شايل كل هموم الناس
واقف وايا الناس بشجاعه
ممكن تكتب كلمه تضرك
تلقي عذاب وهوان وبشاعه
كل رسالتك تعمل حآجه
صوتك يوصل أي إذاعه
فكر تاني يا صحبي ف نفسك
تعمل إيه لو بكره مجاعه
قلت الشعر دا روحي ودمي
هكتب لو كان آخر ساعه
هكتب تاني لأهلي ووطني
عمري ما أهرب م الفزاعه
واهب نفسه لكل الناس
مش هستني لا يوم ولا ساعه
قلمي في إيدي وهو رفيقي
ياما وراني جمال وبراعه
انا مش عايز مال ولا شهره
عايز جنة وعايز طاعه
عايز يرضي المولي عليّا
عايز يوم الحشر شفاعه