جوتين ولا سكيب بقلم الساجده المصريه

جوتين ولا سكيب
زمااااااان كنت بفرح أوى لما واحدة صاحبتى تلبس زيي ونمشى إحنا الاتنين فى الشارع زى بعض كأننا توأم يااااااه كانت أيام وكانت صاحبتى دى شبهى أوى لحد ما فى يوم كنا فى الشغل وكنا لابسين زى بعض ولاقينا واحدة بصت علينا وقالت إيه ده هما غيروا لبس الكافيتريا ساعتها حسينا بهبلنا ومن يومها قررنا نلبس الهدوم فى أيام غير بعض وعملنا جدول علشان اللخبطة 
ومرت الأيام وكل واحدة فينا اتجوزت واخدتنا الحياه لحد ما ظهرت فى حياتى شيرين جارتى إللى بتقلدنى فى كل حاجة اللبس وتسريحة الشعر وحتى ستاير الشقة بصراحة الدم غلى فى عروقى لا واللى غاظنى إنها بتسرق أفكارى فى تزيين الشقة وتعملها وتقول للجيران إيه رأيكم فى الفكرة دى .. ردت عليها نجلاء جارتنا وقالت : حلوة بس الستاير الشيفون دى لسه كوكى جايباهم الإسبوع إللى فات .. والله ماخدتش بالى .. ماخدتيش بالك إزاى ساعة ما كنا بنبارك لها على الأنتريه الجديد .. اهههههه ده انا لما جيبتهم ماكنتش فاكرة شفتهم فين قبل كده
قلت يا بت طنشى خالص لكن حتى كمان لون الشعر والتسريحة لا ده كتير أوى كل ما أغير لون شعرى تعمله زيي طب إنتى شعرك أكرت وسمره تعملى ليه لون دهبى
بس لا لحد كده وكفاية انا لازم أخد بتارى .. نزلت اشتريت باروكه لونها أحمر وجيبت دهان أخضر وبرتقالى وأزرق وجيبت فرشاه واشتغلت تلطيش كل خصلة بلون ولبست الباروكة ودى شافتها من هنا اتجننت .. انتى غيرتى لون شعرك يا كوكى .. اه إيه رأيك .. حلو ده عملتيه إزاى .. بالبويه .. بويه .. اه دى أحدث صرخة فى عالم البتنجان .. إيه عالم الشعر يعنى .. امممممم طيب
ههههههه مافاتش إسبوع ولاقيت شيرين نازلة صريخ وعياط واتجمعو جيراننا كلهم إللى جات لهم كريزة ضحك لما شافوا شيرين شعرها ملطش وماسك فى بعضه وعماله تعيط وتقول طب والله ده أحسن نوع بويه ده انا جيباه جوتين وأحسن من بتاعة كوكى
هههههه إشربى بقى أما خليتك تشيلى شعرك خالص مابقاش أنا كوكى