.
أنا وزير الفلوس ؛
,,,,,,,,,,,,,,,,,,,,,
.
.
زغردي يا أم العيال
أنا عينت وزير الفلوس
في حكومة محمد ظريف
شاعر مصري حلم فِ المنام
إنه رشح نفسه رئيس جمهورية
وأنا قبلت المنصب خلاص
طالما الموضوع فيه فلوس
هوافق علي الكلام
بس أنا ليَّ شرط ياريس
بلاش حد من المسئولين
ييجي في يوم من الأيام
ويقف ع الباب
ويقول الحساب كام
أنا هوزع الفلوس ع الغلابة
بالتساوي والتمام
وهعمل حاوي
وهوقفهم صفوف بإنتظام
وهرجع ثمن الفول
لسابق عهده
وهلبسهم هدوم كمان
عشان محدش يقول
أنا جعان ولاعريان
ويعمل ثورة شقلباظ
وينسي إنه كان عايش
علي لمبة جاز
وهنسق النشاط فيما بيننا
كوزراء كبار
وهنرشد الإستهلاك
في جميع مجالات الحياة
وهنقطع الكهرباء عن الفلاحين
تمشيا مع السياسة الدولية
وتنفيذ أوامر وتعليمات
صندوق تنفيض التراب
والعودة الكريمة لصحن الدار
عشان الكل ينام بدري
بعد شرب كأس المرار
ولايسمع فبلم ولاتمثيلية
ولامسلسل ولامسرحية
ويصحي فِ الفجرية
يعلي صوته ويغني ويقول
ياأمه القمر ع الباب
ويسرح غيطه
لابس طاقيته
ويقف علي رأس أرضه
يغربل الميه بجلابيته
عشان الطمي والطين والتراب
والزرع يشرب مَيَّه كما الزلال
وهنخلي البلد ترجع لأيام زمان
أيام أصالة الفلاح الحقيقي
أيام الساقية والطنبور أبو شادوف
والجردل الحيران
وهيعود القطن المصري كما كان
طويل التيلة قصير النحيزة
وهنصنع منه هدوم تقيلة
عشان برد فصل الحرمان
وترجع الناس تتغطي باللحاف
وإن شاء الله
سوف نقدم نصيحة
حلوة جميلة مليحة
لسيادة وزير الزراعة
عشان يحقق ثورة الضمير
ويخلي الفلاح يعيش مرتاح
ويسمع كلام مدير الجمعية
ويلتزم بالدورة الزراعية
ويزرع مكرونة وملوخية
من دقيق دم الغلابة
ويعمل فطير مشلتت
باالزبدة والسمن الكهرمان
ويدس حمام فِ البرام
وياكل كباب ولحمة كمان
وهنداوي جراحنا المجروحة
إن شاء الله بالهداوة
وندهنها مرهم كلام
ونخلي وزير الصحة
يحط الوصفة فِ البرطمان
ويعالج الفقراء بحسن الحوار
وسوف نقضي علي الفيرس الكبدي
والفشل الكلوي والعجز الجنسي كمان
وسوف تكون حياة الستات تمام التمام
وهنرسم على وشوش اليتامى الإبتسامه
وهنمسح على راس اليتيم
ونعطرها نفحات مسك وزعفران
و لو شفنا ف العيون توهه و إستكانة
هنجفف الدموع بمناديل حرير
وندلها علي طريق السلامة
لتعم الفرحه بين بابا و ماما
وهنخلي وزيرالسياحة
يِسيَّح الحلاوة ويلفف الأطفال
ويمرجحهم في كل مكان
وهنفتح أبواب المتاحف
وندهنها الوان
ونجيب الفرعون المصري
بتاع موسي أيام زمان
ونخلي الناس تتفرج عليه بريال
ووزير التعليم هوَّه ده الأساس
هنخليه يعلم الأولاد ببلاش
ويوزع عليهم بسكويت حمضان
ونوفر ميزانية وزارة الصحة
ونعمل هيصة في فنوات بني علمان
ونزف الأولاد في موكب مهيب
وندفن اجسادهم في مقابرالرهبان
عشلن الناس تخف شوية
وتبطل أكل فول وطعمية
ماله المش والجبن القديم
دا أنا والله ياسيادة الريس
حاطط زلعة أمي حتي تاريخه
في حجرة المعيشة والدقيق
وموصي أم فاروق
علي جبن قريش
وهملاها إن شاء الله
في موسم البرسيم
دي مراجيح هوي الأسعار
خلت الدنيا صارت نار
والناس مش حاسة بالحكومة
ولا بمجلس النواب
كله عايز طبيخ وخضار
والزمان عمال يشقلب فينا
يمين وشمال
ودايما عمالين ندعي ع الإخوان
ربنا ينتقم م الظالم والمظلوم
بحق الني المصطفي العدنان
العيشة بقت صعب ياريس
والسادة الوزراء أكرمهم الله
سوف يعملون ليل نهار
لتدبير احتياجات رمضان
وانا سوف أساعدهم بالفلوس
والمجلس سيصدق ع القرار
بس عايزين سيادتك تساعدنا
تنصحنا بـِ إيه يا محمد بيه
آه يا إبن الإيه
خلتنا نقول كلام يودي الليمان
.
,,,,,,,,,,,,,,,,,,,,,,,,,,
.
بقلم الكاتب / عبدالمجيد الديّهي
من ديوان ( العزف علي وتر الأنغام )
.
,,,,,,,,,,,,,,,,,,,,,,,,,,
.
ليست هناك تعليقات:
إرسال تعليق