ثورة تالتة يعني إيه بقلم الشاعر اسر فاروق

ثورة تالتة 
ثورة تالتة يعني إيه 
يعني فوضي وألا إيه 
ثورة تالتة إزاي وليه 
الوطن خدنا بإيديه
بعد ما شوفناه في وحلة 
قلنا بكره هيبقي أحلي 
بس عايزة شغل منا 
وأما نصبر تبقي سهلة 
قلنا نبني وسط نار 
ونقلل حجم الدمار 
ومهما كان الشر جامد 
قادرة إيدنا ع العمار 
كل يوم بنشوف شهيد 
حتي في العام الجديد
دمه سايل ع الطريق 
بس قوتنا حديد 
الطريق ومشينا فيه 
تاني نرجع لأ وليه 
عندنا همه وعزيمة 
والعدو بنصفى فيه 
مشروعاتنا مش خفية 
ولا أمريكاني ولا وهمية 
بصوا شوفوا ع الطبيعة 
تلقوا حاجة مش عادية 
إنجازات ع الأرض باينة
شيء جديد في كل ثانية 
لو رجعنا بالزمان 
النهاردة حاجة تانية
لو بنشكي م الغلا 
ياما شوفنا كتير بلا 
طول ما فيه قلة ضمير 
مش هنسلم يا ولا 
المهم إن احنا نصمد 
ع القليل معدة تحمد
والله ايامهم قليلة 
هنحاربهم بس نجمد 
فيه فساد أيوه فيه 
مش هنسكت يوم عليه 
هنجرب كل الوسايل 
لحد ما نقضي عليه 
إرجعوا تاني لسنين 
والله كنا تعابنيين 
الحياة كات مستحيلة 
وألا أنتوا يعني مش فاكرين 
كهربا كانت بتقطع 
والقنابل صوتها تسمع 
بلطجة مالية الشوارع 
العيشة ما كنتش تنفع 
بصوا بعيون الحقيقة 
البلد كانت غريقة 
وأنتشلناها بقلوبنا 
من خيانة كات عتيقة 
البلد دلوقتي أفضل 
حتي لو أخطاء بتحصل 
النهوض محتاج سنين 
المهم ان احنا نعمل 
إعرفوا حجم المؤامرة 
بيدوروا علي اي ثغرة 
بيجندوا لنفوس ضعيفة 
عايزيين يولعوها ثورة 
ثورة ضد الإنجازات 
ضد أي معجزات 
ضد أي شيء يحقق 
للوطن تقدمات 
ثورة تخدم للعدو مش خدومة للوطن 
ثورة تخلق ميت صراع وترجعنا للمحن
ثورة تحصد أرواح البشر بالألاف
والنهاية تشريد الجميع ويموت الوطن 
هو ده أصلا طموحهم 
لو هيحصل يوم فرحهم 
بس أنا عارف يا شعب 
إنت عارف إيه غرضهم 
يلا نبني بلدنا مع بعضنا 
ونخاف عليها وحتي علي نفسنا 
اللى باعوا الأرض راحم فين 
إئتلافنا وإختلافنا نعمه بنحمد عليها ربنا 
ثورة تالتة تبقي علي كل الفساد
اللى عشش واللى كان سايق وساد 
حان الوقت نقضي عليه ونقطعه من جذوره
يحيا الوطن.. والمولى قادر ع السداد

https://www.youtube.com/channel/UC-hZHh_WkLoIe4WCqJSf3eg