يا أمّه ضعيفه الشاعر طه ابراهيم

خيال المآته

@@@@@

يا أمّه ضعيفه وصوتك ضعيف
يا أمّه بتحلم تلاقي الرغيف
ولسه طموحك مجرد خيال
وزهره يتيمه ف قلب الخريف
هيفضل طموحك ف قلب الرمال
ويفضل عدوك ف عينك حليف
وتنسي قسوته وتنسي عداءه
ويفضل ف عينك مواطن شريف
ويدهس عليك وينهش ف لحمك
ويفضل ف عينك مهذب لطيف
يا أمّه غريبه ف كوكب غريب
طموحك يا أمّه هواجس وطيف
لإمتي طموحك هيفضل خيال
لإمتي خيال المآته النحيف
مغمي عينيك وقافل دماغك
وقافل طريقك بخنجر وسيف
إقبلتي تكون مجرد ضحيه
وعقلك بيرتع ف وحله وزيف
لإمتي تهيني بجهلك تاريخك
يا أمّه جريحه وجرحك مخيف
ودم الغلابه ف قلبك نزيف
مغرق ترابك وأرض الشوارع
وصرخة حزينه ف حضن الرصيف
تنادي عليكي بحرقه ومراره
ومين اللي يسمع نداء الضعيف
ويمسح بإيده دموع الغلابه
ويبقي عصايه ف إيد الكفيف
يا أمّه كفايه مهانه وضياع
وكوني الحبيبه وكوني الوليف
وكوني اللي يقدر يداوي الجراح
وضمي ولادك ف كوكب نضيف