قضيت عمري وانا مسافر للشاعر على فرج

مساااافر ..
ــــــــــــــــــــــــــــ
قضيت عمري وانا مسافر
بدون رفقه بدون أحباب
بدون تصريح

تعبت وجبت م الآخر
وقلت ارجع ادق الباب
وقلبي جريح

وجيت إمتى منيش فاكر
سؤال حاسس مالهوشِ جواب
ولو حتى مكانشي صريح

في وسط السكة وانا عابر
لقيت قلعه وليها ابواب
لكن أبواب بدون مفاتيح

حاولت ابعد مانيش قادر
فقلت استنى جنب الباب
عساني القالي قلب صريح

خطر على بالي ميت خاطر
مايمكن التقي سرداب
طلع خاطري النوبادي صحيح !

قالتلي روحي قوم خاطر
عساك تلقى هناك أحباب
وتنسى دنية المجاريح

لقيت جوه ملاك حاير
عيونه تسحر الالباب
ونفسة يطير ومش قادر
وفي عيونه سؤال وعتاب
لقيت نفسي لهواه طاير
وقلبي من حنينه داب
سألني ليه كده تسافر
وتنسى إن ليك أحباب
وتنسى ان الزمان غادر
وتتركني ف مرار وعذاب
حاولت ابكي منيش قادر
ولا لاقي لعتابه جواب
مسكت إيديه
ومِلت عليه
وقبلته مابينِ عينيه
وقلت خلاص
هعيش جنبك
واموت جنبك
لقيت الفرحه ماليه عنيه
وقرب مني عالآآآآخر
يا روحي عليه
وقالي قوم بينا نساااافر !