قصيدة انسان نباتى بقلم ياسر شرف

قصيدة انسان نباتى
===========
كباب وكفتة وطرب كمان ونيفة بلدى بسعر جنان
كندوز بتللو وعجالى ضانى بمرقة من الغالى
ده حلم فقرا فى كل مكان ومطلب أصيل لحقوق انسان
لكن الحقيقة وانا محتار أسعارها غالية وكده من نار
وحليتها يعنى بأكل الفول وابقى نباتى كده على طول
بلاها فرخة مع اسماك وشوربة كوارع ويا كباب
بلاها لحمة بسعر جنان عدس وكشرى صديق انسان
بصارة خضرا بتقلية مع طرشى بلدى وطعمية
وفخدة خضرة بفولية مع شربة ببهاريز عدسية
وسلطة خضرا مع بتنجان دى أكلة حرشة بطعم جنان
وفروعها يعنى بابا غنوج وتبولة حلوة بلا فروج
رجيم وصحة لحياتى ولجيبى برضه ابقى نباتى
قولوا معايا فليحيا الفول بسعر محدود او معقول
وبلاها اكل الملوخية وكفاية اكل الطعمية
هو لقبها بالمصرية ويعنى فلافل بالعربية
أوفى صديقة اشتراكية بحضن دافى وحنية
فى القلب دايما محفورة وفى المعدة برضه مهضومة
ومش بس هى ده لأى خضار بسلطة خضرا ويا خيار
يبقى طريقك كده أخضر بإشارة خضرا وتتمختر
يعنى الوفاء ده لأى نبات بنات وأخوة مع ستات
وكفاية ابقى فى حياتى انسان رياضى ونباتى

مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون