فضفضه بقلم طارق السيد

فضفضه
زهقنا كلام وحوار اعلام
وضباب وعذاب وخلاف أحزاب
شوفولكم حل أنا وسطى انحل
قولتوا جملنا هيطلع نخله
لقينا جملكوا وقع فى الوحله
قولتوا عسلنا تملى بيحلى
لاقينا عسلكوا بلسع النحله
عطشان ياخوانا وشغلتى سقا
خنقنى الدين وايجار الشقه
فاتورة النور وفاتورة الغاز
قسط التلاجه مع البوتجاز
ودرس خصوصى لبنتى هناء
وكتاب جبر لأخوها علاء
وده غير نبر الست رجاء
مرات الأسطى على الحلاق
نفر الجمعيه فى واحد منه
تيجى على بابنا وتسأل عنه
أول شهرى ده هم كبير
أأقبض راتبى أدييه للغير
أنياب الفقر أهى غرزت فيا
ومصت دمى شويه شويه
وايد الظلم تقيله عليا
يااما أبوسها ياتضرب فيا
لأ مش هبوسها
أنا دمى عايصها
ولسه الضربه
فى ضهرى حاسسها
صوابعها معافره
عروقها ونافره
مش طايق أشوف
ضحكتها الصفرا
معلش ياناس تقلت عليكوا
فضفضت شويه سلامه عليكوا
بقلم

طارق السيد