ظلم البني آدمين بقلم الشاعر / إسلام عامر

______________________ إسلام عامر ___ ظلم البني آدمين
إيه يابني آدمين مش كفاية
هو الظلم ده مالوش نهاية
يعني لازم اصرخ
بأعلى صوت ليا
واقول حرام عليكم 
ليه تخدعوني
ومن ورا ظهري
تذموا فيا وتظلموني
وتألموني من البداية
والتزم الصمت معاكم 
ماتكلمشي
أسهر طول ليلي
أراجع نفسي
واعيد حساباتي
واكتم جوايا
وجعي وآهاتي
واعيش الواقع
وماحلمشي
ليه يا بني آدمين 
ليه عايزين تقضوا عليا
خفوا القسوة عليا شوية
لما أبعد عنكم 
كافي خيري وشري منكم
تلوموني وتعاتبوني 
من غير ماشوف منكم حنيه 
ايه يابني آدمين
إيه جرى ليكم
ليه الحقد فى قلوبكم عايش
والغدر باين فى عنيكم
لحد امتى يهون عليكم
عيشي وملحي
لحد امتى تضحك وشوشكم
وتبان الفرحة جوة عنيكم
لما تشفوني الحزن مغير 
شكلي وملامحي
ايه يابني آدمين
مش حرام عليكم 
جرحي يكون بإيديكم
ليه تعملوا كده فيا
ليه تحللكم دموع عنيا
آه من عذابي شئ مش شوية
غير نظرتي للناس فى عنيا
غصب عني ومش بإيديا
الجرح تعبني واثر فيا
ليه يابني آدمين
طول ليلي ونهاري
مش داري بنفسي وبحالي
من كل اللي منكم بيجرالي
مشغول البال والفكر
والنوم خاصم عنيا
ايه يابني آدمين 
مش كفاية
هو الظلم ده 
مالوش نهاية
ظلم البني آدمين
كلمات
إسلام السيد حسن
السيد سالم
عامر